2022-yil 4-noyabr kuni O’zbekiston Respublikasi Tashqi ishlar vaziri Vladimir Norov Xitoyning Sindao shahri vitse-meri Lyu Szyansyunni qabul qildi.
O’zbekiston-Xitoy munosabatlarini hamda hududlararo hamkorlikni rivojlantirish masalalari bo’yicha fikr almashildi.
Sindao shahridagi «Xitoy – ShHT» Pilot zonasi va Samarqand shahridagi «O’zbekiston – ShHT» sanoat zonasi o’rtasida aloqalarni yo’lga qo’yish to’g’risida kelishuvga erishildi.
Ikki mamlakatning turli sohalardagi har tomonlama strategik sherikligini yanada mustahkamlash istiqbollari, jumladan, XXR raisi Si Szinpinning 2022-yil sentabr oyida O’zbekistonga davlat tashrifi yakunida erishilgan kelishuvlarni amalga oshirish istiqbollari ko’rib chiqildi.
Ikki tomonlama munosabatlarda mintaqalararo hamkorlik alohida o’rin tutgani barobarida, Sindaoning O’zbekiston shaharlari bilan rishtalarni qo’llab-quvvatlashga tayyorligi ta’kidlandi.
Uchrashuv davomida O’zbekiston Respublikasi Tashqi ishlar vaziri Vladimir Norovga 2019-2021-yillarda ShHT Bosh kotibi lavozimida ishlagan davrida «Xitoy – ShHT» Pilot zonasini rivojlantirishga qo’shgan hissasi uchun «Sindao shahrining faxriy fuqarosi» unvonini berish to’g’risidagi guvohnoma topshirildi.
